पुणे : मराठी विज्ञान परिषद, पुणे विभाग (मविप), मुक्तांगण विज्ञान शोधिका केंद्र व महाराष्ट्र नॉलेज कॉर्पोरेशन लिमिटेड (एमकेसीएल) यांच्या संयुक्त विद्यमाने आयोजित वैज्ञानिक कट्ट्यावर एमकेसीएलच्या ई-प्रशासन विभागाचे सरव्यवस्थापक सचिन सातपुते येणार आहेत. ‘कृत्रिम बुद्धिमत्ता’ हा त्यांच्या गप्पांचा विषय असणार आहे. २४ मार्च रोजी दुपारी चार वाजता सेनापती बापट रस्त्यावरील मुक्तांगण विज्ञानशोधिका केंद्राच्या सभागृहात हा वैज्ञानिक कट्टा भरणार आहे.
कृत्रिम बुद्धीमत्ता आहे तरी काय? आपल्या दैनंदिन वापरात आज ती कुठे आहे? आपण या यंत्रांची हुशारी कुठे वापरू शकतो? त्यांचे वेगवेगळे प्रकार आणि उपयोग कोणते? आपल्यापैकी प्रत्येकाला ते हाताळता येऊ शकतात का? नवीन तंत्रात नवीन पिढीला संधी काय आहेत, या बद्दल सचिन सातपुते बोलणार आहेत.
हा कार्यक्रम सर्वांसाठी खुला असून, अधिकाधिक विज्ञानप्रेमींनी या कट्ट्यावर सहभागी व्हावे, असे आवाहन परिषदेचे कार्याध्यक्ष विनय र. र. यांनी केले.
कार्यक्रमाविषयी :
दिनांक : २४ मार्च २०१८, शनिवार
वेळ : दुपारी चार
ठिकाण : मुक्तांगण विज्ञानशोधिका केंद्र, सेनापती बापट रस्ता, पुणे
